Өнер әлеміне саяхат (тәрбие сағаты) - Тәрбие сағаты - Ұстаздарға көмек - Скачать Рефераты, слайды, тесты - Қазақстандық оқушыларға тегін рефераттар сайты
MENU
Главная » Файлы » Ұстаздарға көмек » Тәрбие сағаты

Өнер әлеміне саяхат (тәрбие сағаты)
24.09.2015, 14:23
«Өнер әлеміне саяхат» тәрбие сағаты

Ашық тәрбие сағатының тақырыбы: «Өнер әлеміне саяхат»
Мақсаты: оқушыларға «өнер» ұғымын түсіндіру, өнерге құштарлық сезімдерін ояту, өнерлі адамдардың жетістіктері арқылы қызығушылықтарын қалыптастыру және эстетикалық тұрғыда тәрбиелеу;
Түрі: саяхат сабақ.
Әдіс – тәсілі: жекелей, топтық жұмыс, эвристикалық, Мюнстернберг әдістемесі.
Көрнекілік, құрал - жабдықтар: слайдтық көрсетілім, буклет, «Чупа – чупс» кәмпиттері, қималар, шашу, ата – аналар әзірлеген қолөнер бұйымдар,
/сынып сабаққа дайын, слайдтық көрсетілім қосылады, домбыраның сүйемелдеуімен күй орындалады/

Сынып жетекші:
- Бүгінгі «Өнер әлеміне саяхат» атты ашық тәрбие сағатымызға қош келдіңіздер!
«Блиц - турнир» ширату сауалдары:
1. Өнерлі дегеніміз кімдер?
2. Өнердің түрлері бар ма?
3. Ауылымызда өнер адамдары барма?

Сынып жетекші:
- Рахмет, ал, енді біз бүгін саяхатқа шығамыз. Саяхатымызды бастамас бұрын мына менің сөздерімнен не туралы айтқанымды табуларыңыз керек. Онда ертедегі көне заттар бар. Біз сол заттар арқылы өткен тарихымызды білетін боламыз. Сендер қызықты көп нәрселерді көре аласыңдар. Қане кім айтады? Мен қандай мәдени орын туралы айтып тұрмын?» /Жауап: мұражай/
- Иә, балалар дұрыс таптыңдар мұражай біз үшін өте құнды мәдени орын. Ендеше мектебіміздің мұражайына саяхат жасап өтейік
- Қандай саз аспаптарын білеміз?
/жауап: домбыра, шертер, жетіген, қобыз, сыбызғы, үскірік, сазсырнай, шаңқобыз, даңғыра, дабыл, асатаяқ /

«Жалғасын тап» ойыны
- 6 балаға чупа – чупстың басына жапсырылған мақал – мәтелдердің жартысы ғана жазылған қызыл, жасыл түсті қималар таратады, қызыл алғандар бір топ, жасыл алғандар бір топ болып тұра қалады да мақалдарды жалғастырып айтып береді/
1. Өнерлі... /өрге жүзер/
2. Өнер алды... /қызыл тіл/
3. Өнерлінің... /өрісі кең/
4. Шебердің қолы ортақ... /шешеннің сөзі ортақ/
5. Өнер... /киелі/
6. Жігітке жеті... /өнер де аз/

Сынып жетекші:
- Өте жақсы! Жарайсыңдар! Тамаша! Енді, саяхатымызды әрі қарай жалғастырайық. Ол үшін тағы менің жұмбақ сөзімнің шешуін табыңдар. Ішінде әншілер, ақындар, бишілер, күйшілер, т. б өнерпаздар және өнер көрсететін сахнасы бар үлкен үй. Онда жақсы - жақсы мерекелер, концерттер өткізіледі. Ол қандай мәдени орын?
/Жауап: мәдениет сарайы/
- Дұрыс айтасыңдар. Біздің ауданымызда, ауылымызда мәдениет сарайы бар ма? /балалар жауап береді, мәдениет үйлерінің суреттерінен тұратын буклет көрсетіледі/
- Осы мәдениет сарайының үлкен сахнасында өнер көрсететін өнерпаздың бірі күй, бірі шығарма, бірі ән, енді бірі сырнай, сыбызғы, қобыз, терме айтады, би билейді. Солай емес пе?
- Сахна – киелі орын. Ал, өнер дегеніміз – адам бойындағы атаның қанымен, ананың сүтімен дарыған ерекше қасиет. Ән айту, күй шерту, сурет салу, қолөнер дегеніміз, яғни тоқыма тоқу, құрақ тігу, ағаштан, темірден бұйымдар жасау, ою ою, тігін тігу т. б. Бүгін бізде қонақта, ортамызда ауылымыздың тума таланты, Мәдениет қайраткері, лауреат көптеген сахналарда өнер көрсетіп жүрген Қыдырмолдин Есмұрат ағаларың. Ендеше, ағамыздың өнерін тамашалап, баршамыз әнге қосылайық!

/«Тарбағатай таулары» әні орындалып, басында шашу шашылып, ортасында ата – аналар өздері әзірлеген қолөнер бұйымдарын арнайы әзірленген үстелге кезекпен әкеліп қояды, әннің соңғы куплетінде қазақ киімін киген 3 оқушы ортаға шығады/

1 – оқушы:
Ән мен күйді төгілтіп
Інжу - маржан шашайық!
Қонақтарды тамсандырып.
Өнерден шашу шашайық.
2 – оқушы:
Домбыраны қолға алып,
Терме айтамын толғанып.
Қобыз да аспап киелі,
Оны бәрі сүйеді.
3 – оқушы:
Сыбызғыны үрлейміз,
Жалқаулықты білмейміз.
Сал күйіңді домбыра,
Атадан қалған бұл мұра.
Домбыра дастан, жыр дастан,
Енді алайын қолыма.
Өнерді сүйген жасынан,
Біз осындай Жас Ұлан!
Сынып жетекші:
- Ал, кәнеки, біздің концертіміз бүгінгі білімдеріңізді байқау болып табылады! /Мюнстернберг әдісі бойынша слайдтан тізбек шығады да қонақтар шатысқан әріптер ішінен өнерге қатысты атауларды атап айту керек, дұрыс тапқандарға сувенирлер, киіз үй, домбыра, тақия т. с. с беріледі/
хлвәнрпакнлфпекиноалыоимбиымпбюлсуретымюбьяыкүйэжрашсөзщкцнй
/қонақтарға төмендегі сөздер жазылған, оқушылардың суреті салынған, өздері жасаған открыткалар таратылады/
Сынып жетекші: ---------------------------- Қонақтар, оқушылар хормен айтады:
Ұғымды, ойлы ететін... ------------------- зерде – зейінің /екі қолмен бастарын ұстап/
Сені өрге сүйрейтін... --------------------- өнер – өрісің /айналып/
Тек ілгері бастайтын... -------------------- талабың /төмен қарай қолдарын жайып/
Ешқашан алдамайтын... ------------------ тапқырлығың /қолдарын алдыға созып, жайып/
Қиындықта сыналатын... ----------------- қайратың /қолдарын жоғары көтеріп/
Бәрінен де күшті... ------------------- тәртібің мен білімің
/әсем күй ойналады/

Сынып жетекші: Қымбатты қонақтар біздің ата – аналарымыздың баласы үшін үй тапсырмасы ретінде орындап келген қолөнер бұйымдарын тамашалаңыздар!
Талай – талай баспалдақты аттармыз,
Ата – ананың үмітін де ақтармыз.
Ұстаздардан алған өнер, білімді,
Жадымызда өмір – бақи сақтаймыз.
Бұл өмірдің лаулаған жалындары,
Бойында өнер оты жалындады.
Үлкен өнерпаз боп болашақта.
Болыңдар еліміздің дарындары.
Тәртіпті, білімді болайық!
Өнермен бал – бұл жанайық!
Келесі тәрбие сағатымызға дейін аман – сау болайық!!!
Категория: Тәрбие сағаты | Добавил: Злой_Админ)) | Теги: (тәрбие, саяхат, әлеміне, сағаты), Өнер
Просмотров: 310 | Загрузок: 0 | Рейтинг: 0.0/0
Всего комментариев: 0
avatar